Mister pinaliguan ng bala sa loob ng bahay, tigok
PATAY na nang madatnan ng kanyang asawa kamakailan ang isang lalaki dahil sa mga tama ng bala sa Bgy. Banay Banay, Lipa City, Batangas.
Ayon sa Lipa City police, 54-anyos ang biktima tubong Orion, Bataan at residente ng Bulate Avenue, Purok 2, Bgy. Banay Banay, Lipa City, Batangas.
Nadiskubre ang pagpatay sa lalaki bandang 11:45 ng gabi dahil sa tawag sa telepono na natanggap ng Lipa City police station mula sa barangay official ng nasabing barangay.
Nang pumunta ang mga pulis sa nasabing address, nakita ang mga bahid ng dugo sa sahig ng sala at tumambad ang duguan at wala ng buhay na biktima na nakahandusay sa sahig.
Sinabi ng mga kabarangay nakarinig sila ng mga sunod-sunod na putok ng baril hindi kalayuan sa kanila bandang alas-7:50 ng gabi bago natuklasan ang insidente.
Tatlong basyo ng kalibre .45 ang nakita ng mga otoridad sa pinangyarihan ng krimen.
