Misis tumangging bumili ng alak, pinatay ni mister
PATAY ang isang misis matapos na saksakin umano ito ng kanyang mister nang tumanggi itong bumili ng alak para ituloy ang paglalasing sa Talacogon, Agusan del Sur.
Nakilala ang biktima na si Sweetie Morgadez, 24, at residente ng Barangay Good Grace sa nasabing bayan.
Pinaghahanap ng PNP ang suspect na si Arkajames Loyola, barber, at residente din ng lugar.
Batay sa ulat ng PNP naganap ang insidente nitong Miyerkules ng gabi sa tahanan ng mag-asawa.
Ayon sa ulat, nagpapabili ang suspect ng alak sa biktima subalit tumanggi ito dahil sa kalasingan.
Dahil dito, nagalit ang suspect at inundayan ng sunod-sunod na saksak ang biktima na naging sanhi ng kamatayan nito.
Matapos ang pananaksak ay mabilis na tumakas ang suspect.
