DIRETSAHANG kinorek ng anak ni Viva big boss Vic del Rosario ang maling perception ng publiko sa streaming platform na Vivamax sa isang one-on-one interview sa bagong YouTube vlog ni Boy Abunda.

Ayon kay Vincent del Rosario, presidente at CEO ng Viva Communications, Inc., mali ang akala ng publiko na “porn site” ang Vivamax.

“I’ve been explaining this to anybody who asks ‘is it a porn site?’ Sabi ko, if you look at the content universe of Vivamax, there are around 900 titles in Vivamax. No more than 80 are considered adult in nature or risque. Otsena lang ho ‘yon, 900 ‘yung titles. So, walang diyes porsiyento ho ang ano du’n, maku-consider na mature audience.

“Even with ‘yung adult-themed na content, we have very safe parental control. Even if you’re an adult na more than 18, hihingan ka pa rin ng pin. So, andu’n yung safeguard. And then, siyempre, ‘yung advocacy ng ano, responsible viewing, tuluy-tuloy naman,” paglilinaw niya.

Nang tanungin ni Boy kung ano ang problema, diretsang sagot ni Vincent, “Wala lang, perception nga ho… akala nga ng tao. Siyempre, (‘yan) ang napag-uusapan sa social media. It’s not. Sharon (Cuneta) did an original for Vivamax, kung naaalala n’yo, ‘yung Revirginized. Si Sarah (Geronimo) did her last concert, online, original for Vivamax, ganundin si Anne Curtis. Si Bela (Padilla) has directed and produced a movie, 366, for Vivamax.”

Nama-magnify lang daw marahil ang ingay ng mga baguhang artista (gaya nina Angeli Khang, Christine Bermas, atbp.) na nagki-create ng ganu’ng sexy image.

Pero sa totoo lang, wala pa itong 10 percent ng kabuuang Vivamax line-up.

Dagdag pa ni Vincent, “Siyempre, lagi we respect our authorities kung ano ang limitations, ano? And note that some of our best directors have worked for Vivamax. Si Brillante (Mendoza) has done seven or eight movies for Vivamax, original. Si Joey Reyes, si Mac Alejandre, si Joel Lamangan.

“I think they welcome ‘yung ano, ‘yung platform as a chance to do films that they couldn’t do because they cannot show those films in cinemas. I think ‘yung freedom din of, you know, creative content. Naiba naman. It excites them, it challenges them, creative juices again.

“And then this is the platform that new directors are discovered. Si Roman Perez, Lawrence Fajardo, all exciting young directors that are now considered part ng new wave.”

At dahil nga sa malaking tagumpay ng Vivamax, na may anim na milyong subscribers na ngayon, nag-launch ang mga Del Rosario nu’ng Enero ng isa pang streaming platform na tinawag nilang Viva One (formerly Viva Prime).

Dito, maaaring makapanood sa halagang P49/month o kaya nama’y P99/month (ads-free). Mas mura sa Vivamax na may subscription rate na P149.

Ang blockbuster movie na Maid in Malacañang ang nagsilbing buwena mano nito.

Sey ni Vincent, “I guess with Viva One now, madali na ma-discern. Dito mas… you want to enjoy, mas wholesome, family-friendly fare. ililipat vivamax to viva one. vivamax mas edgy.”

Dito umano mapapanood ang pelikula ng mga sikat na bituin ng industriya tulad nina Anne, Bela at marami pang iba mula sa mga sinehan.

Bukod sa theatrically-shown films, magkakaroon din ng Viva One Original Series gaya ng Wattpad hit novel na The Rain in España, na ang official teaser ay umani ng 4.1 million views sa loob lamang ng 24 oras.

Sabi pa ni Vincent, layon ni Boss Vic na gawing mas affordable sa lahat ang panonood para manumbalik at ma-excite muli ang local viewers.