LRT, MRT libreng sakay sa ‘Araw ng Kalayaan’
SA Lunes, Hunyo 12, 2023, ay magbibigay ng “Libreng Sakay” ang Light Rail Transit (LRT) Lines 1, 2, at Metro Rail Transit (MRT) 3 bilang paggunita sa ika-125 anibersaryo ng “Araw ng Kalayaan” ng bansa.
Ayon sa management ng LRT Lines 1, 2, at MRT-3, ang libreng sakay sa mga pasahero ay magsisimula 7:00 hanggang 9:00 sa umaga at 5:00 ng hapon hanggang 7:00 sa gabi.
Ang nasabing programa ay handog sa mga pasahero bilang pagdiriwang at pakikiisa sa “Araw ng Kalayaan,” ayon sa management.
Samantala, ipinaalam ng LRT Line 2 management na aalis ang unang tren sa Recto Station at Antipolo Station ng 5:00 ng umaga.
Habang ang huling tren naman sa Antipolo Station ay aalis ng 9:00 ng gabi at 9:30 ng gabi naman sa Recto Station.
Nagpaabot naman ng pasasalamat ang mga loyal commuters ng LRT Line 1, 2, at MRT-3 sa nasabing libreng sakay.
