Sherwin Gatchalian

‘Liberalization ng education dapat magpaunlad ng R&D ng PH’

February 23, 2024 PS Jun M. Sarmiento 68 views

SINABI ni Sen. Sherwin Gatchalian na dapat magbigay ng mga oportunidad ang anumang hakbang para gawing liberal ang sektor ng edukasyon partikular sa larangan ng research and development (R&D).

Binigyang-diin ng senador ang pangangailangang suriin ang maaaring kahinatnan at mga benepisyo sakaling pahintulutan ang pagmamay-ari ng mga dayuhan pagdating sa sektor ng edukasyon.

Dapat sumentro ang nasabing pagsusuri sa kung paano mapapabuti ang kalidad ng edukasyon at ekonomiya ng bansa kung bubuksan natin sa mga dayuhang mamumuhunan ang sektor ng edukasyon, lalo na sa R&D.

“Tumitingin ang lehislatura sa edukasyon bilang isang paraan upang pasiglahin ang ekonomiya. Makakaakit nga ba talaga tayo ng foreign direct investments sa sektor ng edukasyon kung papayagan natin ang ganap na pagmamay-ari ng mga dayuha?” tanong ni Gatchalian sa mga education stakeholder sa nakaraang pagdinig ng Senado sa Resolution of Both Houses No. 6 na nagmumungkahi ng mga pagbabago sa ilang probisyon sa ekonomiya ng 1987 Constitution. Nakatuon ang pagdinig sa Section 4, Article XIV ng Saligang Batas.

Ayon kay Dr. Maria Cynthia Rose Bautista, dating Bise Presidente ng Academic Affairs ng University of the Philippines, mukhang mahihirapan ang bansa na makaakit ng mga dayuhang mamumuhunan sa higher education institutions dahil sa maraming dahilan.

Ipinunto niya na kakaunti lang sa populasyon ng bansa ang kayang makapagbayad ng matrikula sa mga mamahaling eskwelahan.

Sa kaso ng maritime education, inihalimbawa ni Dr. Bautista na malabong pumasok ang mga Europeans sa Pilipinas dahil sa kahinaan nito.

Sa halip, pipiliin daw nilang mag-adopt ng ilang mga eskwelahan o unibersidad para i-accredit na lang mga ito. Binigyang-diin niya na anumang hakbang upang buksan ang sektor sa mga dayuhang mamumuhunan ay dapat na targeted at hindi dapat ganap na liberalized.

Ngunit nanindigan ang policy analyst na si Dr. Emmanuel Santos na maaaring makaakit ang pagbubukas ng sektor ng edukasyon ng mga pamumuhunan mula sa mga dayuhang institusyon ng pag-aaral.

Binanggit niya ang kaso ng Vietnam, na nakakuha mula sa Royal Melbourne Institute of Technology ng AUD 250 milyon na strategic investment funds sa edukasyon, pananaliksik, pakikipagsosyo at imprastraktura ng paaralan.

Gayunpaman, nais ni Gatchalian na suriin ang potensyal na halaga ng dayuhang pamumuhunan sakaling magdesisyon ang bansa na lubusan nang buksan ang sektor ng edukasyon.