LCSP: Face shield policy sa public transportation linawin
MARIING nanawagan ang commuter at transport groups sa Department of Transportation (DOTr) na linawin ang policy sa pagsusuot ng face shield sa mga public transportation.
Ang panawagan ay ginawa ni Atty. Ariel Inton, founder ng Lawyers for Commuters and Safety Protection (LCSP), matapos mag-viral sa social media ang isang traffic enforcer matapos hulihin ang isang driver na nagmamananeho na walang suot na face shield.
Sa record noong August 20, 2020, naglabas ng Memorandum Order ang DOTr na required ang driver at pasahero na magsuot ng face shield habang sakay ng public transportation. Wala namang inilabas na policy sa private vehicle.
Paliwanag ni Inton, kitang kita sa lansangan na halos walang driver ng sasakyan ang nagsusuot ng face shield dahil nakaka-apekto sa paningin ng driver at “talaga naman distracting sa driver.”
Ayon kay Inton, sa Quezon City may face shield ordinance na ipinatutupad na exempted ang driver sa pagsusuot ng face shield.
“Quezon City Ordinace 2965 section 5-Face shields are not required to be worn by person driving transportation and other vehicles motorized or not when glare or other conditions might distract the driver´s vision or create a driving hazard”.
“Paano kung sa Quezon City nangyari ang viral video clip, ang basehan ng enforcer yung DOTr memo, pero merong existing City Ordinace na ipinatutupad ang siyudad,” ani Inton.
“Hindi naman halos naipatutupad ang nasabing circular ng DOTr at pakiusap ng LCSP sana ay mabago agad upang maiwasan ang kalituhan at posibleng pagmulan ng diskusyon sa pagitan ng driver at enforcer. Bakit nga ba sobrang kontrobersiyal ang face shield,” tanong ni Inton.
