KAMPO HENERAL MIGUEL MALVAR, Batangas–Arestado ang lalaki na may granada, baril at droga sa operasyon ng mga pulis sa Brgy. Pantay, Calaca, Batangas noong Huwebes.

Ayon sa report kay P/Col. Jacinto R. Malinao, Jr., hepe ng Batangas police, nahuli ang suspek na si alyas James ng mga tauhan ng Calaca City police dahil sa casing surveillance malapit sa tirahan ng subject.

Huli sa akto ang suspek dahil nakitang hawak nito ang granada paglabas ng bahay. Binantaan pa ng suspek ang mga pulis na huwag lumapit dahil ihahagis niya granada sa kanila.

Doon na dumating ang ibang pulis sa pangunguna ni P/Lt. Col. Radam Ramos, hepe ng Special Weapon and Tactics (SWAT) ng Batangas police.

Hinalughog ang bahay ng suspek bandang alas-8:27 ng gabi at nakumpiska ang isang hand grenade, isang sling bag, isang cal. 38 pistol, 14 na bala at 7 gramo ng shabu na may value na P47,600.

Kakasuhan ang suspek ng paglabag sa RA 10591, RA 9516 at grave threat.

AUTHOR PROFILE

Jojo C. Magsombol