Hitman bumira sa Batangas, 1 todas
PATAY ang lalaking pinagbabaril noong Linggo ng hindi nakilalang professional hitman sa Brgy. San Miguel, Padre Garcia, Batangas.
Ang biktima, na binaril alas-3:50 ng hapon, nakilalang si Freddie Dizon, 43, ng Brgy. Arawan, San Antonio, Quezon.
Naka itim na helmet, itim na jacket at maong na pantalon ang hitman, ayon sa mga saksi.
Nalaman ng mga pulis ang pagpatay sa biktima pasado alas-4:12 ng hapon nang may tumawag sa telepono sa Padre Garcia police at ini-report ang pamamaril.
Sa imbestigasyon ng mga pulis, nakatayo ang biktima sa harap ng Teody at Beth store nang biglang dumating ang suspek sakay ng itim na Yamaha Mio.
Bumaba ang suspek at pinagbabaril ang biktima gamit ang maikling baril.
Tumakas ang suspek patungo sa Brgy. Poblacion, Padre Garcia at iniwang wala ng buhay ang biktima.
Narekober sa crime scene ang 11 fired cartridge casings ng 9mm at isang deformed fired bullet.
