Heaven pasok sa ‘major league’: Best actress sa 39th Luna Awards
PASOK na sa “major league” ang batang aktres na si Heaven Peralejo matapos maiuwi ang kauna-unahang best actress trophy mula sa katatapos na 39th Luna Awards ng Film Academy of the Philippines (FAP) nitong Sabado ng gabi.
Nagwagi ang Viva Artists Agency talent para sa 2022 Metro Manila Film Festival (MMFF) entry na Nanahimik ang Gabi, kung saan nakapareha niya si Ian Veneracion.
Si Noel Trinidad naman, ng 2022 MMFF entry ding Family Matters, ang tinanghal na best actor habang si Direk Mikhail Red ng 2022 MMFF top-grossing entry na Deleter ang pinarangalan bilang best director.
Sa Instagram, sinabi ni Heaven na pinangarap niya ang makilala bilang mahusay na aktres.
“Dreamed it, then real lifed it.
“Awarded by Film Academy of the Philippines as Best Actress for #NanahimikAngGabi…” caption ng dalaga sa IG post.
Sa hiwalay na post, ipinaramdam naman ni Heaven ang “immeasurable joy and gratitude” sa pagkapanalo.
Ibinahagi rin niya ang tropeo sa lahat ng tumulong at sumuporta para makamit niya ito.
“This award belongs not just to me, but to everyone who believed in me and my dreams. Maraming maraming salamat po sa inyong lahat,” aniya sabay lagay ng red heart emoji.
Walang duda na isa si Heaven sa pinaka-busy na artist ngayon ng Viva dahil kabi-kabila at sunud-sunod ang mga proyekto niya kasama ang perennial screen partner at rumored BF na si Marco Gallo.
Mula sa hit series nilang The Rain in España na ipinalabas sa Viva One, naging parte rin ang tandem ng For the Love romance anthology hosted by Pops Fernandez sa TV5 at nagbida sa pelikulang The Ship Show na ipinalabas sa mga sinehan nationwide kamakailan lamang.
