MAS ganadong magtrabaho si Nadine Lustre matapos maghakot ng awards, kabilang na ang best picture, best actress at best director, ang 2022 Metro Manila Film Festival entry niyang Deleter sa katatapos na Gabi ng Parangal na ginanap sa New Frontier Theater.

Sa interview ng ABS-CBN News matapos ang seremonya, sinabi ng aktres na unreal para sa kanya ang pagwawagi ng best actress dahil hindi nila naisip na mapapasama sa walong official entries ang pinag-uusapang Viva Films techno-horror movie.

“Para akong si Lyra (karakter niya sa Deleter), nananaginip pa rin ako!” sabi pa ni Nadine na, incidentally, ay tinanghal ding Female Star of the Night ka-partner ang Male Star of the Night at best actor awardee na si Ian Veneracion ng Rein Entertainment entry na Nanahimik ang Gabi.

Hindi rin daw nila in-expect na maghahakot ng awards ang pelikulang idinirek ng best director winner na si Mikhail Red dahil para sa grupo, sapat nang reward na ginusto ito ng Pinoy moviegoers at patuloy na tinatangkilik sa takilya.

“Isang malaking-malaking bonus para sa Team Deleter so I’m really, really happy,” dagdag pa ni Nadine, na inalay ang tropeo sa kanyang pamilya, mga kaibigan at BF na si Christopher Bariou.

Bukod sa best actress, best picture at best director awards, naiuwi rin ng Deleter ang karangalan para sa best editing, best cinematography, best sound at best visual effects.

“I don’t think I’m ever gonna stop,” naman ang sagot ni Nadine nang tanungin sa future projects niya sa Viva.

Malaking inspirasyon daw at nakaka-motivate na makitang naa-appreciate ang resulta ng pinaghirapan nila.

“Masarap sa pakiramdam na alam mo sa sarili mo na you gave your all and you know you did well, so ang sarap niya sa feeling,” dugtong pa ni Nadine.

Anyway, tabla naman sa ikalawang puwesto ang Nanahimik ang Gabi nina Direk Lino Cayetano, Direk Shugo Praico at Philip King at Mamasapano: Now It Can Be Told ng Borracho Films ni Atty. Ferdinand Topacio na nag-uwi ng tig-limang tropeo.

Wagi ang Nanahimik… ng best actor para kay Ian, best supporting actor para kay Mon Confiado, best musical score, best production design at 3rd best picture.

Ang Mamasapano… naman ang nag-uwi ng best screenplay, 2nd best picture, best original theme song (Ang Aking Mahal), Fernando Poe Jr. Memorial Award at Special Jury Prize, na late in-announce dahil umano sa “technical glitch.”

Paliwanag ng MMFF Board of Jurors: “The announcement came late due to the technical glitch during the recently concluded awards night. However, the MMFF Board of Jurors decided to give the CAST OF THE FILM the Special Jury Prize because of its effective ensemble acting portraying the valor and heroism of young Filipinos fighting the war against terrorism.”

Ang mga hurado ngayong taon ay binubuo nina Direk Laurice Guillen (chairman), Jojo Garcia (co-chairman) at FDCP Chairman Tirso Cruz III, Cong. Dan Fernandez, scriptwriter Raquel Villavicencio, Ino Manalo, Alex Cortez, Noah Tonga, Atty. Victor Pablo Trinidad at Lucky Blanco (members).

Tatlong trophies naman ang napagwagian ng 3:16 Media Network at Mentorque Productions entry na My Father, Myself: Best float, best child performer (Shawn Niño Gabriel), best supporting actress (Dimples Romana) .

Hindi nakadalo si Dimples kaya ang tumanggap ng kanyang award ay sina Jake Cuenca, Quinn Carillo at Sean de Guzman.

Ang family drama naman ng Cineko Productions na Family Matters nina Noel Trinidad, Liza Lorena, Agot Isidro, Mylene Dizon, Nikki Valdez, JC Santos, atbp. ang nagkamit ng Gatpuno Antonio J. Villegas Cultural Award habang ang Ten17 at TinCan Productions entry na My Teacher, na pinagbibidahan nina Toni Gonzaga at Joey de Leon, ang pinarangalan ng Gender Sensitivity award.

Dumalo rin sa Gabi ng Parangal ang Star for All Seasons na si Vilma Santos-Recto para personal na tanggapin ang Marichu Vera-Perez Memorial Award.

Sina BB Gandanghari, Giselle Sanchez at Cindy Miranda ang nagsilbing hosts ng awards night.

Hanggang January 7, 2023 pa mapapanood nationwide ang entries sa MMFF na may temang “Balik Saya” ngayong taon.