DAHIL sa tumataas na bilang ng krimen sa Metro Manila at mga reklamo mula sa mga residente, nanawagan si Senadora Nancy Binay kay Philippine National Police (PNP) chief Gen. Rommel Marbil na madaliin ang pagdaragdag ng mga pulis sa Makati, na binibigyang-diin ang pangangailangang tugunan ang tumataas na kriminalidad sa lungsod.

Sa pagdinig para sa 2025 PNP budget, hiniling ni Binay sa mga opisyal ng pulisya na maglaan ng mas maraming tauhan para sa tinaguriang financial capital ng bansa, dahil sa mga nakakabahalang ulat ng krimen tulad ng pagnanakaw, snatching, ilegal na droga, at iba pang petty crimes.

“As the financial capital of the Philippines, it is important that we maintain peace and order in Makati, where not only locals, but also expatriates, and various other visitors of the many commercial establishments, offices, and embassies frequent the city day and night,” sabi ni Binay.

Nagpahayag ang mga residente ng paulit-ulit na pagkabahala ukol sa tumataas na kriminalidad sa lungsod. Nitong buwan, dalawang suspek ang naaresto dahil sa pagnanakaw umano sa dalawang Japanese nationals sa Salcedo Village.

Ang panawagan para sa dagdag na pulis ay nagbabadya ng agarang pangangailangan na palakasin ang puwersa ng pulisya sa Makati upang mapanatili ang estado nito bilang ligtas at aktibong urban center.

Sa kasalukuyan, mayroon lamang 512 na tauhan ng pulisya ang Makati. Ayon sa datos, ang populasyon ng lungsod ay umaabot sa 4,200,000 tuwing araw at bumababa sa 280,150 tuwing gabi.

Dahil dito, ang police-to-population ratio ay nasa 1:17,004 tuwing araw, at 1:1,134 naman tuwing gabi.

Sinabi ni Police Col. Fajardo na kapos ang kanilang tauhan, na nagpapatrolya sa tatlong barangay — Bel-Air, Poblacion, at Guadalupe Viejo — tuwing gabi. Ang Guadalupe Viejo ay isa sa pinakamataong lugar sa Makati, habang ang Poblacion ay kilala para sa nightlife nito.

Ang Substation 6, na responsable sa tatlong barangay — Bel-Air, Poblacion, at Guadalupe Viejo — ay may 33 personnel lamang. Ang bawat isa ay nagtatrabaho ng 12 oras kada shift, anim na araw sa isang linggo.

Muling ipinahayag ni Binay ang kanyang pagkabahala sa kakulangan ng pulisya sa kanyang bayan.

“Baka po pwede ma-augment itong personnel from Makati. Being the financial capital of the Philippines, tapos alam naman po natin kapag mayroon tayong mga VIP guests, usually nagche-check in din sila sa mga 5-star hotel sa Makati,” ani ng senadora.

“So baka lang po for next year’s allocation, baka pwede naman madagdagan ang for Makati,” dagdag niya.

AUTHOR PROFILE

PS Jun M. Sarmiento