Carlos Yulo, iba pang PH Olympians bibisita kina PBBM, FL Liza Marcos
Palasyo may nakahanda nang parangal
MAY nakahanda ng programa at parangal si Pangulong Ferdinand “Bongbong” Marcos Jr. kay 2-time 2024 Paris Olympic gold medalist Carlos Yulo.
Ayon sa Presidential Communications Office (PCO), bibisita sa Palasyo ng Malacañang Yulo at ang iba pang mga Filipino olympians sa darating na Martes, August 13 2024.
Ayon sa PCO, darating ang mga Olympians Martes ng hapon at sasalubungin ng kanilang pamilya sa Villamor Airbase.
Saka dederetso ang mga atleta sa Phillipines International Convention Center (PICC) kung saan sila sasalubungin ng mga government officials, bago tutulak para sa isang heroes’ parade sa mga key areas sa Manila na magtatapos sa Palasyo.
Sasalubungin sila ni Pangulong Marcos kasama si First Lady Liza Araneta-Marcos at ang First Family.
Magkaroon din ng programa kung saan personal silang bibigyan ng parangal ng Pangulo pati na ang kanilang iuuwing insentibo, bilang pagkilala sa hindi matatawarang kontribusyon sa Philippine sports at sa naging performance sa 2024 Paris Olympics.
Nabatid na maliban kay Yulo, mag uuwi rin ng bronze medal sina Aira Villegas at Nesthy Petecio.
