Bong Go

Bong Go pinuri mabilis na progreso sa Mindanao

March 28, 2022 People's Journal 698 views

PINASALAMATAN ni Senator Christopher “Bong” Go ang pribadong sektor o mga negosyante sa patuloy na pakikipagtulungan sa Duterte administration na makamit ang sustainable development at inclusive growth sa bansa, partikular sa Mindanao.

Ginawa ni Go ang pahayag sa pagtatalumpati sa 2nd General Members Meeting ng Philippine Chamber of Commerce and Industry (PCCI)-Mindanao.

Ang online event ay inorganisa upang ipagdiwang ang pagluklok ng mga bagong regional governor para sa Bangsamoro Autonomous Region in Muslim Mindanao (BARMM), Western Mindanao, Northern Mindanao, Southwestern Mindanao, Southeastern Mindanao, Eastern Mindanao at Western Mindanao. Mindanao.

Ikinagalak ni Go ang mabilis na pag-unlad ng rehiyon ng Mindanao sa ilalim ng kasalukuyang administrasyon at muli niyang pinagtibay ang pangako ni Pangulong Rodrigo Duterte na higit pang palalakasin ang pagbangon ng ekonomiya ng rehiyon sa kabila ng mga kaguluhang dulot ng pandemya ng COVID-19.

“Sa nakalipas na ilang taon, ang aming sariling isla ng Mindanao ay nakaranas ng positibo at makabuluhang mga pag-unlad sa mga tuntunin ng pag-unlad ng imprastraktura, pribadong pamumuhunan pati na rin ang kapayapaan at seguridad. Talagang sinugal ng Pangulo ang lahat para sa kinabukasan ng ating mga anak,” ani Go.

“Tinupad niya ang kanyang pangako at nagresulta ito sa magandang business climate, if not for this pandemic. Buti na lang mayroon tayong isang leader na decisive at may political will. So far, so good ang ating COVID response at gagawin namin ang lahat para makabalik na tayo sa ating normal na pamumuhay,” paniniyak ng senador.

Nangako ang mambabatas na susuportahan ang mga hakbang na magpapabilis pa sa proseso ng pagbangon habang lumilikha ng mga bagong pagkakataon para sa mga lokal na negosyo.

Kamakailan ay itinulak niya ang pagpasa ng panukalang batas na magtatatag ng Metropolitan Davao Development Authority na may layuning gawing isa ang Davao sa pangunahing sentro ng negosyo at pamumuhunan.

Inihain ni Go noong 2021, ang Senate Bill No. 2157 ay naglalayong isentralisa at pangasiwaan ang mga pagsisikap at mga hakbangin sa pag-unlad na tumutugon sa mga hamon na kinakaharap ng Davao City at mga karatig na lokal na yunit ng pamahalaan. Ang pinagsama-samang bersyon ay naaprubahan noong Enero at nakatakdang pirmahan ng Pangulo.

Nangako rin si Go na magsusulong ng mga panukalang magpapahusay sa kakayahan ng rehiyon na tumugon sa mga hinaharap na krisis sa kalusugan, bilang chair ng Senate Committee on Health.

Siya ang nag-akda at nag-sponsor ng Malasakit Centers Act, na nagbibigay ng maginhawang access sa kalidad at abot-kayang pangangalagang pangkalusugan sa lahat ng Pilipino.

Sa kasalukuyan ay mayroong 151 Malasakit Centers sa buong bansa, 37 dito ay matatagpuan sa iba’t ibang pampublikong ospital sa Mindanao.

“Hanggang Jolo mayroon nang Malasakit Center para hindi na mahirapan ang ating mga kababayan. Sabi ko, bakit natin pahirapan ang mga Pilipino na humingi ng tulong kung pera naman nila ‘yan. Dapat ibalik natin ito sa kanila sa mabilis na serbisyo,” ayon kay Go.

“Rest assured na ipaglalaban ko ang mga batas na ang makikinabang ay ‘yung mga mahihirap, ‘yung mga helpless, hopeless at walang matakbuhan,” idiniin niya.

Nakatulong din ang senador sa pagsasabatas ng 24 local hospital laws noong 2021, na kinabibilangan ng pag-upgrade sa Caraga Regional Hospital sa Surigao City at Siargao District Hospital sa Dapa, Surigao del Norte; Malita Women’s and Children’s Wellness Center sa Davao Occidental; Mayor Hilarion A. Ramiro Sr. Medical Center sa Ozamiz City, Misamis Occidental; at Misamis Oriental General Hospital sa Medina, gayundin ang pagtatatag ng Davao Occidental General Hospital sa Malita.

Kamakailan ay nag-sponsor din siya ng 15 bagong panukalang batas, kinabibilangan ng pag-upgrade sa Cotabato Sanitarium sa Sultan Kudarat, Maguindanao; Sulu Sanitarium sa Jolo, Sulu; at Northern Mindanao Medical Center sa Cagayan de Oro City; at isa pa para itatag ang Northeastern Misamis General Hospital sa Villanueva, Misamis Oriental. Ang lahat ng mga panukalang batas ay naghihintay na lamang ng lagda ng Pangulo.

Para matiyak ang pangmatagalang pag-unlad ng rehiyon, binigyang-diin ni Go ang pangangailangang ipagpatuloy ang pamumuhunan sa mga programa tulad ng Universal Health Care, libreng edukasyon, libreng irigasyon at ang pangunahing programa ng Administrasyon na ‘Build, Build, Build’ (BBB).

Kabilang sa mga big-ticket projects ng BBB program ay ang ‘Bridge of Peace and Unity’ na magpapababa sa oras ng biyahe mula Tubod, Lanao del Norte hanggang Tangub City, Misamis Occidental mula dalawang oras hanggang pitong minuto, at ang Mindanao Railway System na mag-uugnay sa mga pangunahing lungsod sa isla.

Binigyang-diin din ng senador ang kahalagahan ng mga pagsisikap ng pamahalaan sa pagbuo ng kapayapaan, kung saan ang pangunahin ay ang paglikha ng BARMM kasunod ng pag-apruba ng Bangsamoro Organic Law noong 2019 at ang pagpapalawig ng termino ng Bangsamoro Transition Authority.

AUTHOR PROFILE