BBM-Sara Aerial photo ng mga nasirang mga bahay sa Dinagat Islands. Kuha ni VER NOVENO

BBM-Sara UniTeam tutulong sa pagtatayo ng mga sinirang bahay ni ‘Odette’ sa VisMin

January 2, 2022 Ryan Ponce Pacpaco 662 views

HABANG abala ang BBM-Sara UniTeam sa malawakang relief operations, tiniyak naman ni dating senador Ferdinand ‘Bongbong’ Marcos, Jr., na tutulong din sila upang unti-unting maitayo ang mga nasirang tahanan ng bagyong Odette sa Visayas at Mindanao.

Sa panayam, sinabi ni Marcos na nalulungkot siya sa sinapit ng ating mga kababayang nawalan ng bahay kaya layunin niya ngayon ay makabangon uli ang mga ito mula sa matinding trahedya sa kanilang buhay.

“Pangako ko sa inyo na magkakaroon tayo ng reconstruction, lahat ng tulong na kailangan ibibigay natin. Huwag kayong mawalan ng pag-asa at huwag panghinaan ng loob dahil maraming tao ang laging handang tumulong sa inyo,” anang dating Ilocos Norte governor.

Pinasalamatan ni Marcos ang mga volunteers at donors na kagya’t nagpadala ng tulong sa nauna niyang panawagan na tulungan ang mga biktima ng bagyo.

“Nakapagdala kami sa mga ibat’ ibang lugar, pero naiba ng kaunti dito sa Palawan because ang pangangailangan eh dati yung pagkain. Nagdala kami ng bigas. Nagdala kami ng pagkain, tapos tsinelas. Tapos ang hinihingi ngayon is construction materials para maayos ng mga tao yung mga bahay nila kaya iyon ang hahakutin namin pabalik dito paggaling namin ng Maynila,” sabi pa nito.

Bahagyang nabalam ang relief operation sa Palawan kamakailan dahil na rin sa sama ng panahon, ngunit binigyang-diin ni Marcos na hindi nito mapipigilan ang plano at pangako niyang makapaghatid ng mga construction materials bilang karagdagang tulong sa mga nawalan ng bahay sanhi ng bagyo.

Samantala, tiniyak din ni Davao City Mayor Inday Sara Duterte na nagpapatuloy ang pamamahagi ng relief goods sa mga apektado pang lugar, kahit na abala ang BBM-Sara UniTeam sa paglikom naman ng mga construction materials.

“Nagbigay tayo ng bigas at cash po para sa Puerto Princesa City, provincial government ng Palawan, at sa iba’t ibang probinsya. Iba’t-iba po yung sources ng ating donation. Meron pong galing sa mga governors. Meron galing sa provincial government ng Davao Occidental. Galing sa city government of Davao, galing sa Lakas-CMD at galing (kay) Bongbong Marcos,” sabi pa ng presidential daughter.

Ani Inday Sara, ginagawa ng BBM-Sara UniTeam ang lahat ng paraan upang maibagi ang agarang tulong. “And will always pray that we rise with our heads held high from this adversity,” wika pa nito.

AUTHOR PROFILE