BBM

BBM 66%, winner sa NCR

March 19, 2022 Ryan Ponce Pacpaco 335 views

Leni, Isko sadsad sa MM

PINANSIN ng Pulse Asia Research, Inc. ang malaking paglipat ng voters’ preference para kay presidential frontrunner Ferdinand ‘Bongbong’ Marcos Jr. sa National Capital Region (NCR) matapos siyang makakuha ng 66 porsyento sa survey nitong Pebrero, o tumaas ng siyam na porsyento kumpara sa 57 porsyento niya nitong Enero.

Sa panayam ng ANC News Channel, sinabi ni Pulse Asia Research Director, Ana Tabunda, na kapansin-pansin ang malaking pagtaas sa voter preference ni Marcos matapos ma-dismiss ang kanyang mga disqualification cases sa Commission on Elections (Comelec), at kahit pa nga hindi siya dumalo sa ilang mga presidential forum.

“More are considering him (Marcos) in NCR, Leni Robredo’s voter preference in NCR declined by two percent. There could have been some shift to Bongbong Marcos,” ani Tabunda.

Si Leni Robredo ay nasa malayong pangalawang pwesto sa NCR na mayroong 18 porsyento ngayong Pebrero o mas mababa ng dalawang porsyento sa kanyang numero nitong Enero habang si Isko Domagoso naman ay nakakuha lamang ng 13 porsyento at bumagsak ng 10 porsyento kumpara sa kanyang bilang nitong Enero.

Malaki umano ang posibilidad na ang pagtaas ng bilang ni Marcos ay may kaugnayan sa mga na-dimiss na disqualification cases sa kanya sa Comelec.

“It’s a possible factor,” ayon sa maiksing tugon ni Tabunda.

Nang tanungin naman siya kung nakaapekto ang mga hindi niya pagdalo sa presidential forum sumagot siya na, “Well the strategy (not to attend forums) is not hurting him (Marcos), that’s for sure.”

Sa kabuuan, sa Pulse Asia survey nitong Pebrero 18-23, lumalabas na 45 porsyento ang lamang ni Marcos sa kanyang pinakamalapit na katunggali matapos siyang makakuha ng 60 porsyentong voter preference.

Nasa malayong pangalawa si Leni Robredo na nakakuha lamang ng 15 porsyento, sinundan ni Isko sa 10 porsyento, Manny Pacquiao, walong porsyento at Ping Lacson dalawang porsyento.

Ang 68 porsyento ni Marcos sa Mindanao ay tumaas din ng dalawang porsyento mula sa kanyang 66 porsyentong nakuha nitong Enero.

Nananatili ring matatag ang mga numero ni Marcos sa ibang lugar tulad ng Balanced Luzon na mayroong 58 porsyento at Mindanao, 53 porsyento.

Nananitili ring matatag ang tinaguriang “Solid North” voting bloc para kay Marcos at tila hindi naapektuhan sa mga pahayag ng kampo ni Robredo na nabubuwag na ang tinaguriang “Solid North.”

Nakakuha si Marcos ng 74 porsyento sa CAR, 82 porsyento sa Region 1, at 86 porysento sa Region 2.

Si Robredo ay mayroong lamang isang porsyento sa CAR, pitong porsyento sa Region 1, at anim na porsyento sa Region 2, malinaw na malayong-malayo ang kanyang numero sa mga lugar na kinabibilangan ng tinaguirang “Solid North.”

AUTHOR PROFILE