SALUDO tayo sa mabilis na pag-aksiyon ni Bureau of Customs (BOC) Commissioner Jagger Guerrero hinggil sa panawagan natin na agarang imbestigahan ang umano’y tangkang pagpuslit sa P50 million halaga ng mga high end OPPO cellular phones sa pantalan kamakailan.

Una nating kinuwestiyon noong Agosto 7 kung bakit mukhang inilihim ng BOC ang pagkakasamsam sa mga mamahaling mobile phones, gayung magandang accomplishments ito para sa naturang ahensiya.

Marso 12, 2021 pa nang mabuko ang tangkang smuggling base na rin sa Warrant of Seizure & Detention na inisyu ni Port of Manila District Director Michael Angelo Vargas.

Ang unang deklarasyon ng Waterwide Merchandising Corporation ay naglalaman lamang ang kanilang kontrabando ng mga earphones at microphones, ngunit nang suriin na ng mga taga-Customs Intelligence and Investigation Service (CIIS) ay doon nila nalaman na ang 209 boxes na naka-karga sa 20-footer container at mga high end OPPO cellular phones.

Ang market value nito ay tumataginting na P50 million.

Kinuwestiyon natin kung bakit hindi ito iniharap sa media ng District Director, gayung malaking accomplishment na sana iyon para sa pamunuan ng BOC hanggang sa mabulatlat ng ‘Uncovered’ na may ilang tao umano ang nagpa-facilitate upang aregluhin ito sa halagang P25 million.

Salamat sa mabilis na tugon ni Commissioner Jagger dahil nito lamang August 16, 2021 ay kaagad itong naglabas ng memorandum na ipinadala kay Deputy Commissioner Raniel T. Ramiro, Intelligence Group chief, upang tablahin ang planong ‘settlement’ sa naturang kargamento.

“WHEREFORE, premises considered, the Order dated 23 July 2021 of the District Collector, Port of Manila in accepting claimants officer of settlement is hereby REVERSED and SET ASIDE. Accordingly, the shipment of 1×20’ Container bearing No.TCLU 6879132 which was found to actually contain 195 Cartons “OPPO’ Brand Cellular Phones; 5 Cartons A12 (146 pieces); 3 Cartons RENO5 (37 pieces; 187 Cartons of A15S (7,470 pieces) consigned to WATERWIDE MERCHANDISING CORPORATION BE FORFEITED in favor of government, to be disposed in the manner provided by law.”

“Further, the claimant is hereby directed to pay 500% surcharge of the applicable duties and taxes for the undeclared items as an administrative penalty for violation of Section 1400 of the CMTA,” saad pa sa memo.

Good job, Commissioner Guerrero sir. Kung hindi siguro sa maagap ninyong pagtugon sa aming expose’ ay malamang napalusutan na naman kayo ng ilang mga tulisan diyan sa BOC.

Makakokolekta na rin tiyak ang pamahalaan ng mahigit P50 million, labas pa ang dapat bayarang penalties at iba pang bayarin na dapat imulta ng consignee.

Kaya lang, may kulang po, Mr. Commssioner, Sir.

Hindi ba dapat ay sampahan ng kasong kriminal ang mga taong nasa likod ng tangkang smuggling? Bakit wala nito?

Hindi ba dapat, bukod sa Waterwide ay malaman din kung sinu-sino ang kanilang kasabwat sa BOC at iba pang pribadong indibiduwal?

Dapat ay imbestigahan ni Com Jagger ang CISS na tukuyin ang mga taong nasa likod ng tangkang smuggling para sila’y makasuhan, makulong at hindi na pamarisan. Iyan ay kung may political will si Commissioner.

Nasabi na natin sa nakalipas na kolumn na isang alyas Kimberly na sangkot sa multi-million drug shipment sa pantalan ang nasa likod ng pagpapalusot sa mga mamahaling cellular phones.

Ibig sabihin, hindi na nga nahuhuli si Kimberly dahil sa kaso ng ipinagbabawal na gamot, eto’y nagpapalusot naman siya ng mga mamahaling mobile phones.

Tama ang ginawa ni Guerrero na ipagbawal ang pagpapalabas sa mga misdeclared items, pero dapat ay mayroon ding kinasuhan.

Puwede naman nilang matukoy kung sinu-sino ang nasa Waterwide at pigain kung nasaan si Kimberly. Retired Army general si Commissioner Guerrero kaya kung gugustuhin nitong palalimin ang imbestigasyon ay kaya nitong gawin.

Alang-alang na rin sa marching order ng Pangulong Duterte na giyera kontra droga at korapsiyon sa Bureau of Customs.