TIKLO at nakuhanan ng halos P1 milyong halaga ng ilegal na droga ang isang absent without official leave (AWOL) na policewoman at kasabwat niya nang pagbentahan ng shabu ang pulis na nagpanggap na buyer noong Miyerkules sa Valenzuela City.

Kinalawit nina P/Capt. Regie Pabdora ng District Drug Enforcement Unit ng Northern Police District (DDEU-NPD) sina alyas Joan, 37, AWOL na policewoman, at alyas Trudis, nang tanggapin ang markadong P2,000 cash, kapalit ng ibinentang shabu sa police poseur-buyer dakong alas-4:20 ng hapon sa harapan na kanilang tirahan.

Nasamsam ng pulisya sa dalawa ang humigit-kumulang sa 143.6 gramo ng shabu na nagkakahalaga ng P976,480.00 at mga drug paraphernalia, kabilang ang isang glass pipe na may bahid pa ng pinatuyong dahon ng marijuana.

Ayon kay P/Maj. Jeraldson Rivera, hepe ng DDEU, halos isang linggo na nilang minomonitor ang galaw ng mga suspek hanggang kumagat sa kanilang pain na nagresulta sa kanilang pagkakadakip.

AUTHOR PROFILE

Edd Reyes