LASOG-LASOG ang katawan ang isang 61-anyos na American national nang bumagsak ito sa ika-9 na palapag mula sa ika-27th palapag ng isang tower condominium, sa Malate, Maynila, Biyernes ng umaga.

Kinilala ang biktima na si alyas “Kevin”, diborsyado, at nanuluyan sa Royal Plaza Twin Tower, sa Remedios St., Malate, Manila.

Sa ulat ng Homicide Section ng Manila Police District (MPD), bandang alas 7:00 ng umaga ng Agosto 9 nang madiskubre ang katawan ng biktima sa ika-9 na palapag ng nasabing condo.

Maraming nakitang sugat at pinaniniwalaang lasog lasog ang katawan nito at ulo ng biktima nang madiskubre.

Nabatid na isang okupante ng condo ang tumawag sa Administrative Office ng condo hinggil sa narinig na malakas na kalabog sa nasabing palapag…

Nang usisain ng mga empleyado ng nasabing condo, nadiskubre nila ang bangkay ng Amerikano na nakahandusay sa ilalim water control tank.

Ayon pa sa isinagawang imbestigasyon, nag-iisa nakatira sa isang unit ang biktima simula pa noong Marso 2023.

Hinihintay pa ang resulta ng awtopsiya upang malaman kung may foul play. Nakikipag-ugnayan na rin ang pamunuan ng Homicide Section sa US Embassy para sa disposisyon ng bangkay.

AUTHOR PROFILE

Jonjon Reyes