ARESTADO ang isang lalaki na umamin na adik siya sa online gambling nang holdapin ang Alfamart convenience store sa Malvar, Batangas kamakailan.

Base sa report, madaling araw umatake ang suspek na si alyas John matapos pag-aralan ang kanyang target na 24 oras ang operasyon.

Ayon kay Police Major Ralph Dayag, hepe ng Malvar police, alas-12:00 pa lang ng hatinggabi umiikot-ikot na ang suspek at nag mamatyag sa lugar bago sumalakay gamit ang kutsilyo at nakuha ang P5,000 mula sa tindahan.

Sa pag-review ng CCTV, natunton ito kung saan ang lugar ng suspek at mukhang kabisado ang lugar at mga daan sa likod ng Alfamart.

“Na adik po ako sa online na sugal kaya ko po nagawa ito at ako po ay nagsisisi sa aking ginawa” pahayag ng suspek matapos mahuli.

Paalala ni Major Dayag sa lahat ng mga business establishments, mahalaga ang CCTV at paglalagay ng mga guwardiya dahil laging sa mga oras na alanganin umaatake ang mga masasamang loob.

AUTHOR PROFILE

Jojo C. Magsombol