Abogadong stand-up comedian certified ka-Viva
Handa na ang abogado at stand-up comedian na si Edward Chico na dalhin ang kanyang sariling tatak sa komedya sa mas malawak pang audience ngayong siya ay isa nang ka-Viva.
Si Atty. Chico ay gumawa ng pangalan sa mundo ng stand-up comedy. Nagdala siya ng katatawanan sa madla nang mag-headline siya ng sold-out shows at mag-host ng ilang corporate gigs.
Siya ang co-founder ng Insanithink, isang comedy troupe na kilala para sa kakaiba nitong tatak sa thinking comedy.
Kilala rin si Atty. Chico bilang miyembro ng Comedy Cartel, isang pioneer sa point-of-view stand-up comedy ng Pilipinas.
Bukod doon, dala-dala pa rin niya ang kanyang kaalaman sa batas tuwing magkakaroon siya ng appearance sa TV at radio shows bilang isang legal expert.
Siya rin ang radio host ng “Tanggol Karapatan” na umeere sa Radyo Veritas. Isa rin siyang law professor, bar lecturer at consultant sa iba’t ibang ahensya ng gobyerno.
Handa na si Atty. Chico na magdala ng katatawanan at kaalaman sa mas maraming tao gamit ang kanyang sariling tatak sa komedya at kadalubhasaan sa batas bilang bagong miyembro ng Viva Artists Agency (VAA).
