Ipinahayag ni Police Lt. Col. Melvin Florida, commander ng MPD Raxabago Police Station 1, ang resulta ng kanilang operasyon kaugnay sa pagkakatimbog sa mga miyembro ng robbery-holdap group na pinamumunuan ng nasibak na pulis.
6 na miyembro ng robbery-holdup group tiklo sa Maynila, Valenzuela
NASAKOTE ng mga pulis ang anim na miyembro ng grupong responsable sa robbery-holdup sa Maynila na umano’y pinamumunuan ng nasibak na pulis sa Valenzuela at Maynila kamakailan.
Nalansag ang robbery-holdup group na pinamumunuan ng lider na si alyas Joel, 42, dating miyembro ng PNP.
Nalambat rin sina alyas Jhaymar, 32; alyas Yang, 21; alyas Dominador, 41; alyas Pandong, 37; at isang alyas Ronnie.
Responsable ang mga natiklo sa ilang panghoholdap sa Balut, Tondo, partikular noong Nov. 18 kung saan pinagbabaril pa ang biktima na maswerte na hindi tinamaan.
Unang nasakote ng Smokey Mountain police community precinct si alyas Pandong na nahulihan pa ng droga.
