KAMPO Heneral Paciano Rizal–Umabot sa 57 drug suspek ang naaresto sa isang linggong operasyon laban sa illegal na droga ng Laguna PNP simula Hulyo 15 hanggang 21, ayon kay P/Col. Gauvin Mel Unos, acting Provincial Director ng Laguna Provincial Police Office.

Epektibo ang Barangay Intelligence Network (BIN) sa iba’t-ibang bayan sa Laguna sa laban kontra sa droga, ayon sa pulisya.

Umabot sa 46 na operasyon ang isinagawa at nakumpiska ang humigit kumulang na 70.59 gramo ng shabu na may halagang P486,812.

Nasa kustodiya ng kanya-kanyang operating units ang mga naaresto habang isusumite sa Forensic Unit para sa forensic examination ang mga nakuhang ebidensiya.

Inihahanda na ang mga dokumento para sa isasampang kaso laban sa mga suspek na paglabag sa Republic Act 9165 (Comprehensive Dangerous Drug Act of 2002).

“Patuloy ang mga operasyon ng Laguna PNP laban sa iligal na droga upang tuluyang mailayo ang mga mamamayan sa mapaminsala at mapanganib na epekto ng bawal na gamot,” ayon kay Unos.

AUTHOR PROFILE

Gil Aman