Castro

3RD PETITION VS CONFI FUND NI VP SARA INIHAIN

December 17, 2023 People's Tonight 432 views

Sa Korte Suprema

INIHAIN sa Korte Supreme ang ikatlong petisyon laban sa P125 milyong confidential fund ni Vice President Sara Duterte noong 2022.

Ang petition for certiorari ay inihain nina Gabriela Rep. Arlene Brosas, ACT Teachers Rep. France Castro, Kabataan Rep. Raoul Manuel, Bayan Muna chair Neri Colmenares, at dating Bayan Muna Reps. Carlos Zarate, Ferdinand Gaite, Eufemia Cullamat at Raymond Palatino.

Ang kinukuwestiyong P125 milyong confidential fund ni Duterte ay naubos sa loob ng 11 araw batay sa datos ng Commission on Audit (COA).

Kasama sa inihaing petisyon ang pagbibigay ng Korte Suprema ng kapangyarihan sa COA na suriin kung saan ginastos ang confidential funds, gaya ng mga regular fund kung saan nakalagay kung saan ito ginastos.

“Petitioners further seek the restitution of the P125 Million unlawfully used as confidential funds by the OVP,” sabi sa petisyon.

Hiniling ng Supreme Court (SC) kay Duterte na maghain ng sagot sa ikatlong petisyon.

Noong Nobyembre 7, naghain ng petisyon sa SC laban sa confidential fund ni Duterte sina Atty. Christian Monsod, Atty. Barry Gutierrez, ekonomistang si Maria Cielo Magno, dating Commission on Elections Commissioner Augusto Lagman, dating Commission on Filipinos Overseas chair Imelda Nicolas, at Ateneo Human Rights Center executive director Ray Paolo Santiago.

Ang ikalawang petisyon ay inihain naman ni dating SC Senior Associate Justice Antonio Carpio, kasama ang ilang abugado at mga pari noong Nobyembre 15.

Sa ilalim ng inaprubahang budget para sa susunod na taon, inalis ng Kamara at Senado ang confidential funds sa ilalim ng Office of the Vice President at Department of Education na may kabuuang halagang P650 milyon at kapuwa pinamumunuan ni Duterte.

AUTHOR PROFILE