2 sa 6 na suspek sa pagnanakaw timbog
ARESTADO ang dalawa sa anim na suspek na tumangay ng alahas at pera mula sa dalawang biktima ng kidnapping sa motel sa Biñan City, Laguna noong Lunes ng madaling araw.
Kinilala ni Laguna OIC Provincial Director PCol. Harold Depositar ang mga arestadong suspek na sina Arvin Ryan Alora at Art Berroya.
Nakatakas naman ang apat na kasama ng dalawa na sina alyas Scottie Jr., Butchoy Capunitan at dalawang babae na sina alyas Luna at Ginami, alyas Nami.
Ayon sa report, bandang 1:30 ng madaling araw pagpasok ng mga biktima na sina Moises Lagacion at Kenneth Oliver sa Paradise Inn sa Bgy. San Antonio, Biñan City sapilitan ding pumasok ang anim na suspek.
Doon na kinidnap ang dalawang biktima at isinakay sa sasakyan saka doon kinulimbat ang kanilang mga alahas, pera at electronic devices.
Matapos makuha ang mga gamit, ibinaba ang dalawang biktima sa Bgy. Platero.
Agad namang na-intercept ng mga pulis ang mga suspek sa Manabat St. sa Bgy. San Antonio at doon din naaresto.
Narekober mula sa dalawa ang dalawang .38 caliber revolver, mga bala, tatlong sachet ng shabu, mga alahas, electronic devices ng biktima at P10,000 cash.
